21 лютага адзначаецца Міжнародны дзень роднай мовы
Сумная гісторыя ў гэтай даты. У 1952 годзе ў Бангладэшы прымусова была ўведзена мова ўрду замест роднай мовы бангла. Гэта выклікала пратэст насельніцтва. Падчас хваляванняў пяцёра студэнтаў былі застрэлены паліцыяй. Адбылося гэта ў 1959 годзе. Тыя пяць хлопцаў, што загінулі за сваю мову, сталі нацыянальнымі героямі і пакутнікамі. Цяпер мове бангла знікненне не пагражае. А ў 2000 годзе ЮНЕСКА абвясціла 21 лютага Міжнародным днём роднай мовы.
Нашай мове знікненне таксама не пагражае, бо, як высветлілася, мы родную мову ведаем добра. У гэтым нам дапамог пераканацца тыдзень беларускай мовы і літаратуры, які праходзіць з 17 па 22 лютага ў нашай школе. На працягу шасці дзён вучні 5-11 класаў прымаюць ўдзел у мерапрыемствах, падрыхтаваных настаўнікамі беларускай мовы і літаратуры. Мэта гэтых дзён — садзейнічаць папулярызацыі роднай мовы. Самыя маленькія і старэйшыя вучні школы пашырылі свае веды, пазналі штосьці новае для сябе і раскрылі свае здольнасці, аб якіх, магчыма, і самі не здагадваліся.
З вучнямі 5-7 класаў настаўніца беларускай мовы і літаратуры Дарошка Алена Мікалаеўна правяла гульню-віктарыну “Лепшы знаўца беларускіх казак”. Па агеньчыках у вачах дзяцей было відаць, што гэтая тэма любімая для іх. Спачатку вучні ўдзельнічалі ў віктарыне, затым была гульня, дзе трэба было з дапамогай малюнкаў здагадацца, пра якую казку вядзецца гаворка. А самыя творчыя і артыстычныя натуры праявілі сябе ў пастаноўцы ўрыўкаў з казак, конкурсе малюнкаў па матывах беларускіх казак.
Вярэніч Вікторыя Мікалаеўна запрасіла вучняў 5-8 класаў у літаратурную гасцёўню “Кветкі – сонцавы дзеткі”. Крыжаванкі, загадкі, рэбусы, пераапрананне ў незвычайныя самаробныя касцюмы… Не пералічыць усяго, з чым сутыкнуліся наведвальнікі гасцёўні.
Вучні старэйшых класаў мелі магчымасць глыбей пазнаёміцца з мірам паэзіі нашага земляка, паэта-юбіляра, прымаючы ўдзел у паэтычным конкурсе на лепшага чытача вершаў А.Куляшова.
Найбольшае захапленне вучняў выклікала тэатралізаванае прадстаўленне “Неўміручасць баек К.Крапівы”.
Увазе гледачоў былі прапанаваны інсцэніроўкі баек: “Дзед і баба”, “Дыпламаваны Баран” і “Дзіця, Вожык і Змяя”, прагляд прэзентацыі пра жыц-цё і творчасць знакамітага байкапісца. Закрыццё тыдня будзе аглядам таго, што праводзіцца ў школе за гэты час. Тыдзень праходзіць на добрым узроўні, паказвае, што вучні цікавяцца беларускай мовай, літаратурай, фальклорам, спадчынай, актыўна ўдзельнічаюць ва ўсіх мерапрыемствах. І я пераканана, што такія тыдні трэба праводзіць не толькі таму, што яны павучальныя, змястоўныя, цікавыя, а яшчэ і таму, што яны прывіваюць любоў да роднай мовы. І хочацца верыць, што тыя вучні, якія душой дакранаюцца да творчасці беларускіх паэтаў і пісьменнікаў, будуць і далей імкнуцца, каб роднае слова гучала ў вяках.
Валерыя УСЦІНАВА,
вучаніца 11 класа
ДУА ”Камінтэрнаўская СШ”