З блінамі і забавамі наладзілі Масленіцу ў аграгарадках Магілёўскага раёна
Разгулялася Масленіца на мінулым тыдні, праводзячы Зіму ды сустракаючы прыгажуню-Вясну. З блінамі і забавамі наладзілі святкаванне ў аграгарадках нашага раёна. Весяліліся ўсе ад душы!
А ў нядзелю справаджвалі матухну-Зіму ў аграгарадку Мяжысеткі. Людзей шмат сабралася, бо пастараліся арганізатары, каб цікава было ды весела.
Дзякуючы клопату кіраўніка філяла “Сервалюкс Агра” СЗАТ “Сервалюкс” Васіля Мазурыка, прадпрыемства арганізавала продаж розных смачных страваў, а пах ад шашлыка прыцягваў усё новых жадаючых пакаштаваць яго. Неўзабаве і ў скокі ішлі, бо ад вясёлай народнай музыкі нельга было ўстаяць.
Цудоўную атмасферу свята стварылі работнікі мясцовага Дома культуры разам з удзельнікамі мастацкай самадзейнасці. Тэатралізаваная дзея “Гуляй, Масленіца!” была так па-майстэрску разыграна, што здавалася ўсё яваю. З падзякай за бялюткі снег і цікавыя гульні праводзілі Зіму, якая ў адказ за дабрыню і пашану падаравала ўсім Масленіцу, каб накарміла яна блінамі, ды павесяліла. А як заспяваў народны ансамбль народнай песні “Прыпеўка” пад кіраўніцтвам Ніны Герасімёнак, дык падтанцоўваць узяліся ад малога да вялікага.
З песнямі, танцамі і жартамі сустракалі Вясну, а затым у вясёлым карагодзе праводзілі Масленіцу. Калі ж гульні пайшлі, дык на дзіва ад жадаючых паказаць свой спрыт адбою не было. У паяданні масленічных бліноў на хуткасць спаборнічалі дарослыя, на веніках скакалі дзеці – шмат аказался жадаючых пабыць у ролі Бабы Ягі.
Задавальненне, радасць, смех панавалі наўкола, заахвочвала яшчэ і тое, што пераможцы конкурсаў атрымоўвалі ў падарунак добрыя сувеніры, якіх закуплі шмат за сродкі птушкафабрыкі.
Гульняў і спаборніцтваў было столькі арганізавана, што мелася магчымасць кожнаму знайсці нешта цікавае на свой густ. Шашкі, дартс, гарадкі… нават трапнасць сваю можна было праверыць у стрэльбішчы, а сілу – у перацягванні каната. Не дзіва, што захапілі спаборніцтвы прысутных на свяце начальніка аддзела ідэалагічнай работы, культуры і па справах моладзі Аляксея Пруднікава і старшыню Дашкаўскага сельвыканкама Валерыя Бабіча, якія паказалі на што здольныя.
Прыемным сюрпрызам у той дзень стала выступленне заслужанага аматарскага калектыву Рэспублікі Беларусь ансамбля народнай музыкі “Світанак” пад кіраўніцтвам Уладзіміра Сянькова. Цудоўная самабытная музыка і прыгожыя народныя песні выклікалі самыя шчырыя водкугі прысутных на свяце.
Гулянне прадаўжалася, а мы ад’язджалі з пачуццём светлай радасці, ад таго, што жывуць такія народныя традыцыі якія ўзнаўляюць нашу спадчыну.
Фота Наталлі ГРУЗД