Няма раўнадушных грамадзян да той інфармацыі, якую даносяць газеты, радыё, тэлебачанне. Асаблівую ролю выконваюць журналісты рэгіянальнай прэсы, расказваючы пра людзей у самых аддаленых кутках, дасягненнях працаўнікоў, што праслаўляюць сваю родную зямлю. Менавіта з гэтых слоў пачаў сваё выступленне старшыня Магілёўскага аблвыканкама Уладзімір Даманеўскі на ўрачыстай цырымоніі ўзнагароджвання работнікаў друкаваных і электронных сродкаў масавай інформацыі, прысвечанай Дню друку і Дню работнікаў радыё, тэлебачання і сувязі.Губернатар падкрэсліў ключавыя пазіцыі СМІ Магілёўшчыны ў краіне, звярнуўшы ўвагу таксама на той значны факт, што Магілёўская вобласць стала першай, дзе пачало працаваць рэгіянальнае тэлебачанне – канал “Беларусь 4”.

“Магілёўшчына – радзіма Прэзідэнта, і мы заўсёды павінны імкнуцца займаць лідыруючыя пазіцыі”, – падкрэсліў Уладзімір Даманеўскі.

Гаворачы аб неабходнасці падтрымкі СМІ ўладай, старшыня аблвыканкама ў той жа час станоўча адзначыў хуткую адаптацыю друкаваных выданняў ва ўмовах рыначнага гаспадарання. Як прыклад – на сённяшні дзень дваццаць з дваццаці пяці рэдакцый газет вобласці, заснавальнікамі якіх з’яўляюцца райвыканкамы, з’яўляюцца самаакупнымі.Віншуючы з прафесійным святам, Уладзімір Даманеўскі падзякаваў журналістам за праўдзівасць і аб’ектыўнасць, а таксама апраўданую крытыку ў адрас выканаўчай улады, заўважыўшы, што гэта дазваляе аператыўна выпраўляць недапрацоўкі на месцах.

Начальнік галоўнага ўпраўлення ідэалагічнай работы, культуры і па справах моладзі аблвыканкама Андрэй Кунцэвіч адзначыў аўтарытэтнасць і важную ролю ў жыццядзейнасці краіны СМІ, што не толькі нясуць інфармацыю, але і з’яўляюцца каталізатарам грамадскай думкі. Як было заўважана, вялікі попыт на інфармацыю існуе дзякуючы высокаму прафесіяналізму журналістаў і захаванай спадчыне. Назваўшы прозвішчы тых, хто пакінуў глыбокі след у журналістыцы, Андрэй Кунцэвіч пажадаў цяперашняму пакаленню новых ідэй і дасягненняў, вострага пяра.

Пераможцам абласнога конкурсу – лепшым выданням і журналістам — былі ўручаны Ганаровыя граматы, грашовыя прэміі, каштоўныя падарункі, кветкі.

Калектыў нашай газеты ўзнагароджаны Ганаровай граматай Магілёўскага абласнога ўпраўлення Міністэрства па надзвычайных сітуацыях Рэспублікі Беларусь за аператыўнае асвятленне падзей і фактаў дзейнасці органаў і падраздзяленняў па надзвычайных сітуацыях, прапаганду асноў бяспекі.

Прагучала шмат цёплых слоў. Вялікае прадстаўніцтва кіраўнікоў аблвыканкама, горада, лідэраў абласных грамадскіх арганізацый, прыгожыя канцэртныя нумары – усё гэта надало мерапрыемству асаблівую ўрачыстасць.

Святлана ДЗЯДУШКА.
Фота Алега ФАЙНІЦКАГА.