Івана Купала — самае таямнічае і рамантычнае, агорнутае мноствам легенд і містычных гісторый свята. Менавіта ў гэты дзень, па павер’ях нашых продкаў, ведзьмы ўладкоўвалі шабаш, русалкі спрабавалі зацягнуць сваіх ахвяр пад рачныя карчакі, а ў лесе падцікоўвалі лясуны. Як і тысячу гадоў назад, юнакі і дзяўчаты плялі вянкі, загадвалі жаданні, скакалі праз вогнішча, купаліся пад месяцам і, вядома ж, шукалі загадкавую папараць-кветку.
У ноч з 6 на 7 ліпеня святочныя мерапрыемствы, арганізаваныя ўстановамі культуры, прайшлі ў многіх вёсках нашага раёна. Нават пераменлівае і часам дажджлівае надвор’е не астудзіла запал аматараў самадзейнай творчасці і яшчэ больш умацавала іх жаданне пагрэцца каля купальскага вогнішча.
Галоўную гераіню свята — Купалінку — з надыходам цемры сустракалі ў аграгарадку Ўсход. На адкрытай пляцоўцы перад сельскім домам культуры разгарнулася тэатралізаванае прадстаўленне, у якім распавядалася аб даўніх традыцыях святкавання Купалля. Разам з Купалінкай самадзейныя артысты спявалі абрадавыя песні, ладзілі гульні і конкурсы. Не абыйшлося ў той дзень і без каверз нячыстай сілы — вядзьмаркі, якая паспрабавала сапсаваць ўсім настрой. І як заўсёды, перамагчы ліхадзейку героям свята дапамаглі гледачы, якія з задавальненнем прынялі ўдзел ва ўсіх конкурсах і гульнях.
Святочны настрой жыхарам і гасцям аграгарадка задаваў жаночы вакальны ансамбль «Вербніца». Ну і, вядома ж, не абыйшлося ў гэту ноч без яркага купальскага вогнішча.
***
Жыхароў в д.Нікіцінічы на святкаванне Івана Купалы паклікалі самадзейныя артысты, якія на ўпрыгожанай кветкамі і лентамі павозцы з музыкай і песнямі праехаліся па сялу. Перад мясцовым домам культуры і стары, і малы вадзілі з Янам, Купалінкай, вадзянікамі і лясунамі карагоды, танчылі і спявалі. Асаблівы каларыт святу надало выступленне народнага ансамбля народнай песні «Беларусачка».
***
Народныя абрады і фальклорныя традыцыі былі пакладзены ў аснову гулянняў у Палыкавічах. Удзельнікі свята з задавальненнем карагодзілі, спускалі на ваду вянкі, шукалі таямнічую папараць-кветку, пускаліся ў скокі і спявалі.
Увогуле ноч на Івана Купала стала адным масавым гуляннем для ўсіх жыхароў нашага раёна.

Алеся СІДАРЭНКА.
Фота Алега ДЗЯТЛАВА.