Нам — 80!

(Пачатак у №№ 44, 45).
50-ыя гады характарызуюцца пад’ёмам у краіне сельскай гаспадаркі. Актыўна развіваецца сацыялістычнае спаборніцтва, на ўздыме арцельная гаспадарка.
“Соцыялістычная праца” у гэтыя гады з’яўляецца органам Магі-лёўскага раённага камітэта КПБ і раённага Савета дэпутатаў працоўных, Магілёўскай вобласці.
Большая частка матэрыялаў, якія публікуюцца ў той час, характэрна лозунгавымі заклікамі. Да прыкладу: “Створым багацце кармоў для калгаснай жывёлы!”, “Пасадзіць бульбу квадратна-гнездавым спосабам і ў лепшыя тэрміны!”, “Вырасцім высокі ўраджай грэчкі!” і г.д.
У 1953 годзе выйшла пастанова райвыканкама і райкома КПБ “Аб учраждзенні раённай Дошкі гонару для пераможцаў у сацыялістычным спаборніцтве”, што затым рэгулярна асвятлялася ў газеце. Акрамя таго, практычна ў кожным нумары ішлі так званыя “перадавіцы” аб рабоце партыйнага актыву раёна.
Цэлыя старонкі прысвячаліся рабоце на той час Вярхоўнага Савета БССР. У адным з нумароў газеты (1953 г.) было надрукавана “Савецка-Германскае Камюніке аб перагаворах паміж Савецкім Урадам і Урадавай Дэлегацыяй Германскай Дэмакратычнай Рэспублікі”. У гэтым жа нумары было расказана пра “Абед у Г.М.Маленкова ў чэсць Урадавай Дэлегацыі Германскай Дэмакратычнай Рэспублікі”.
Апошні ў 1953 годзе нумар за 27 снежня выйшаў з інфармацыйнымі паведамленнямі аб пленуме ЦК КПБ і правядзенні пасяджэння Вярхоўнага Суда СССР. Тут жа была змешчана заметка “Прыгавор прыведзен у выкананне”, у якой было сказана, што “23 снежня прыведзен ў выкананне прыгавор Спецыяльнага Судовага Прысуцтва Вярхоўнага Суда СССР у адносінах асуджаных да вышэйшай меры крымінальнага пакарання расстрэлу – Берыя Л.П., Меркулава В.Н., Гагідзе С.А…» і інш.
З 2 ліпеня 1954 года “Соцыялістычная праца” мяняе свой знешні воблік, выходзіць ужо на чатырох старонках і тыраж павялічваецца з 1 тысячы да дзвюх з палавінай.


Падрыхтавала
Святлана ДЗЯДУШКА.
(Працяг будзе).

Добавить комментарий